Ираны дайны улмаас эрчим хүч, тээвэр болон түүхий эдийн зардал өсөж байна. Мөн нефть-химийн үйлдвэрлэл зогсонги байдалд орсноор синтетик мяндас болон полиэстерийн нийлүүлэлт буурч, хувцас үйлдвэрлэлийн түүхий эдийн өртөг өмнөх оноос 18-22 хувиар нэмэгджээ. Энэ нь хувцасны үнийг өсгөж, худалдан авагчдад шууд нөлөөлж эхэллээ.

Мөн ачааны хөлөг онгоцууд мөргөлдөөний бүсээс зайлсхийж, Африк тивийг тойрон замаа уртасгахад хүрсэн. Үүний улмаас Азиас Европ руу чиглэсэн тээвэрлэлтийн хугацаа 10-14 хоногоор сунаж, чингэлэг тээврийн зардал зарим чиглэлд 2-3 дахин өсөөд байна. 

Эдгээр хүчин зүйл нь Өмнөд Азийн хувцас үйлдвэрлэлд цохилт болж байна. Энэ бүс нутаг нь дэлхийн бэлэн хувцасны үйлдвэрлэлийн цөм нь болдог.

Жилд 50 тэрбум ам.долларын экспорт хийдэг Өмнөд Азийн хувцас үйлдвэрлэл нь түүхий эдийн үнийн өсөлт болон тээвэр логистикийн саатлаас үүдэн хүндрэлтэй тулгараад байна. Үйлдвэрлэгчид болон салбарын шинжээчдийн тооцоогоор бэлэн хувцасны үнэ 10-15 хувь өсөх төлөвтэй. 

Хувцасны шүүгээгээ шинэчлэхээр төлөвлөж буй бол үнийн өсөлт жижиглэн худалдаанд бүрэн нөлөөлж амжаагүй байгаа тул хэрэгтэй хувцсаа аль болох эрт авахыг салбарын мэргэжилтнүүд зөвлөж байна. Харин үнийн өсөлтийн давалгаа нь ирэх саруудын загваруудад илүү мэдрэгдэхээр байна. 

‍